《畀家中長輩學識用WhatsApp，或者真係一件錯事》
究竟當一班長輩開始認識數碼世界，用晒智能電話，會有咩影響呢？
一開始冇事，近幾年開始出事。
循例都要講下好處先嘅，
就係「返唔返屋企食飯」呢個議題得到快速解決方法。
咁仲有冇其他好處？
應該就冇喇。
果日同阿強出嚟食飯，佢身同感受，話幾年前瀨過一次嘢之後已經Close晒所有Auto Download。
阿強回憶起傷心事：
「每逢大時大節，佢哋根本就係恐怖份子。
朋友就一句『新年快樂（加Emoji）』，佢哋就Photo加Video，老媽子驚我唔死，Send足七條片嚟祝我新年快樂。
咁結果點？
佢同我一齊爆Data！兩個即刻收到Msg(流動數據增值)。
仲要佢啲電話費都係我交！」
「我個時咩都Auto Download，1am部電話已經被長輩圖征服，加埋幾十條片，條條幾分鐘，有啲仲重覆咗。」
不過呢個都事少，錢啫。雖然我冇，但起碼解決到。
反而長輩喺WhatsApp嘅流料更令我在意。
唔知點解，
長輩眼中嘅Whatsapp世界非常美好，冇大話，甚至係神聖嘅。
Whatsapp啲人講咩，佢哋都會至死不渝咁信到十足十。
如果係錄音，真確性仲會以倍數增加。
當你嘗試反駁：「單嘢邊個講架？」
佢會秒速答你：「WhatsApp囉！」
冇遲疑；冇思索；冇考慮。
WhatsApp嘅權威性真係好大呀…
你再懷疑佢會加多句：「Whatsapp個個朋友都收到呀！」
梗係啦，你個個朋友都同你一樣年紀呀嘛！
呢兩年，佢哋都帶嚟不同經典流料，其中一條就係佢同我講：
「學下人哋霆鋒啦！人哋自己縫針都敢呀！幾捱得呀！」
心水清嘅朋友都估到，
網上有篇文叫「他知道，哭是沒有用的」，
講述阿霆鋒17歲拍戲時隻腳傷咗，流嘅血裝滿「四個膠袋」！你冇睇錯，係四個。
拍完先霸氣去醫院，醫生話遲一步佢就會死！
Anyway梗係冇事……之後縫針，仲要唔麻醉！
但霆鋒不哼一聲，面不改容。去到最後一針，霆鋒仲話「我來縫！」
而醫生又真係畀佢自己縫！出色！
最後爆出一句「沒有嘗試過的人生，我都想嘗試一下」嚟收尾。
劇情真係夠晒詭異，曲折離奇。
我唯有同佢講：
「嗯…即係呢，拍戲受傷應該係堅嘅，帶傷上陣都未必係流嘅……不過若然佢真係玩到自己啪針，個醫生應該會畀人炒咗；另外佢仲流出四大袋血的話，理論上阿霆鋒都香Q咗架啦。佢係唔會仲生勾勾喺度玩《十二道鋒味》架。」
另外亦有好多流料，包括「今日嚴打路人唔遵守交通規則」、「每日食檸檬會有助乜乜物物」、「中國人嘅祖先係韓國人」，仲有一次將馬來西亞發生嘅搶劫影片當咗係香港。
佢哋好鍾意將呢類流料轉發去《我們這一家》Whatsapp Group，避無可避。
最大鑊係當啲社會大事發生，長輩好容易被Wtsapp洗腦。
唔係長輩心地唔好，而係有人懷不軌意圖。
始終老一輩唔似我哋，少接觸網上資訊，唔知世途險惡。
但係時代進步，Wtsapp點都會用到。
所以我哋要幫下手，
細細個佢哋教我做人，今日就我哋教佢上網捉小人！
不過慶幸嘅係長輩中都有精明人，
皆因每次媽子轉發流料，第一個笑出聲嘅總係老豆！
IG: cheungson88
Search